ข่าวทั่วไป

ໂຮມຊຸມນຸມສະຫລອງວັນສ້າງຕັ້ງ ສະຫະພັນກໍາມະບານລາວຄົບຮອບ 65 ປີ

ໂຮມຊຸມນຸມສະຫລອງວັນສ້າງຕັ້ງ
ສະຫະພັນກໍາມະບານລາວຄົບຮອບ 65 ປີ

ຂປລ. ໃນວັນທີ 1 ກຸມພາ 2021 ສູນກາງສະຫະພັນກຳມະບານລາວ ໄດ້ຈັດຕັ້ງໂຮມຊຸມນຸມສະເຫລີມສະຫລອງ ວັນສ້າງຕັ້ງສະຫະພັນກຳມະບານລາວ ຄົບຮອບ 65 ປີ (1/2/1956-1/2/2021) ຢ່າງສົມກຽດ, ໂດຍມີ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີບັນດາການນໍາພັກ, ລັດ, ຜູ້ອາວຸໂສ-ບໍານານ, ພ້ອມແຂກຖືກເຊີນ ເຂົ້າຮ່ວມ.

ການຈັດຕັ້ງພິທີໂຮມຊຸມນຸມໃນຄັ້ງນີ້, ເປັນການຫວນຄືນມູນເຊື້ອຄວາມສາມັກຄີເປັນຈິດໜຶ່ງໃຈດຽວ ຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວ ເຂົ້າໃນການປະຕິບັດພາລະກິດສອງໜ້າທີ່ຍຸດທະສາດ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ທັງເປັນການ ອາໄລອາວອນຢ່າງສຸດຊຶ້ງ ແລະ ຈົດຈໍາລໍ້າລຶກຄຸນງາມຄວາມດີ ອັນໃຫຍ່ຂອງຂອງປະທານ ໄກສອນ ພົມວິຫານ ທີ່ແສນເຄົາລົບຮັກ, ພ້ອມບັນດາຜູ້ນໍາພັກ-ລັດ, ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານລາວບັນດາເຜົ່າທັງຊາດ ທີ່ໄດ້ເສຍສະຫລະເລືອດເນື້ອ ເພື່ອຄວາມເປັນເອກະລາດ ແຫ່ງຊາດ ແລະ ຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.

ໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ມີຄຳເຫັນໂອ້ລົມ ໂດຍໄດ້ສະແດງຄວາມຍ້ອງຍໍສັນລະເສີນ ຕໍ່ອົງການກໍາມະບານຂັ້ນຕ່າງໆ, ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ໃນທົ່ວປະເທດ ທີ່ໄດ້ເຊີດຊູນ້ຳໃຈຮັກຊາດ, ຮັກລະບອບໃໝ່, ສາມັກຄີເປັນອັນໜຶ່ງອັນດຽວກັນ ຢູ່ອ້ອມຂ້າງສູນກາງພັກ ແລະ ລັດ, ຜ່ານຜ່າຄວາມຫຍຸ້ງຍາກລຳບາກ, ອຸທິດສະຕິປັນຍາ, ກໍາລັງວັງຊາ ແລະ ເສຍສະຫລະທຸກສິ່ງທຸກຢ່າງ ເພື່ອຜົນປະໂຫຍດລວມຂອງປະເທດຊາດອັນແສນຮັກຂອງພວກເຮົາ ຕະຫລອດໄລຍະທີ່ຜ່ານມາ, ພ້ອມທັງເນັ້ນໃຫ້ ຄະນະບໍລິຫານງານສູນກາງສະຫະພັນກໍາມະບານລາວ ແລະ ສະຫະພັນກຳມະບານແຕ່ລະຂັ້ນ ຈະຕ້ອງໄດ້ສືບຕໍ່ຄົ້ນຄວ້າ, ບຸກບືນ, ປັບປຸງແກ້ໄຂໃນຕໍ່ໜ້າ ແລະ ພ້ອມກັນກໍານົດທິດທາງແຜນການ, ວຽກງານຈຸດສຸມໃນແຕ່ລະດ້ານຕາມວິໃສທັດ ແລະ ຄໍາຂວັນ :“ ກໍາມະບານລາວ ເຂັ້ມແຂງ ທັນສະໄໝ ສາມັກຄີ ມີວິໄນ ແລະ ສາ ກົນກໍາມະຊີບ” ໃນນັ້ນ, ໃຫ້ສືບຕໍ່ຄົ້ນຄວ້າ, ປະສານງານກັບທຸກພາກສ່ວນທີ່ກ່ຽວຂ້ອງເພື່ອປົກປ້ອງສິດ, ຜົນປະໂຫຍດຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານລາວໃຫ້ແຂງແຮງ ແລະ ເປັນຮູບປະທໍາຫລາຍກວ່າເກົ່າ ນັບທັງສະມາຊິກກໍາມະບານຢູ່ຕາມສໍານັກງານອົງການພັກ-ລັດ, ກໍາມະກອນ ແລະ ຜູ້ອອກແຮງງານຢູ່ແຕ່ລະຂົງເຂດ ເພື່ອບໍ່ໃຫ້ເຂົາເຈົ້າຖືກເອົາລັດເອົາປຽບຈາກຜູ້ໃຊ້ແຮງງານ, ຜູ້ອອກ ແຮງງານທີ່ມີຄວາມປອດໄພ, ມີລະບົບສະຫວັດດີການສັງຄົມ, ມີວຽກເຮັດງານທໍາທີ່ໝັ້ນຄົງ ແລະ ມີລາຍຮັບທີ່ໝັ້ນທ່ຽງ; ເພີ່ມທະວີວຽກງານຂະບວນການ ໂດຍສະເພາະການຈັດຕັ້ງປະຕິບັດຂໍ້ຂັນແຂ່ງ 5 ເປັນເຈົ້າຂອງສະຫະພັນກໍາມະບານລາວ ໃນໄລຍະຜ່າມາ ເຫັນວ່າຄຸນນະພາບບໍ່ທັນສູງເທົ່າທີ່ຄວນ ຍັງມີລັກສະນະແລ່ນນໍາປະລິມານຫລາຍກວ່າ ຈຶ່ງບໍ່ສາມາດຊອກໄດ້ວຽກດີຄົນເດັ່ນ.
ສະນັ້ນ, ຊຸມປີຕໍ່ໜ້ານີ້ ການປັບປຸງຮູບແບບ ແລະ ເນື້ອໃນການເຄື່ອນໄຫວຂອງການຈັດຕັ້ງສະ ຫະພັນກໍາມະບານແຕ່ລະຂັ້ນ ຕ້ອງຕິດພັນກັບການປະຕິບັດໜ້າທີ່ວິຊາສະເພາະ, ຕິດແໜ້ນກັບການສົ່ງເສີມຕົວແບບການຜະລິດ, ຜູ້ອອກແຮງງານທີ່ດີເດັ່ນ, ມີຫົວຄິດປະດິດສ້າງ ແລະ ຊອກຫາວິລະຊົນແຮງງານຢູ່ໃນຂົງເຂດຕ່າງໆ; ພ້ອມກັນນັ້ນ, ກໍ່ຕ້ອງຍົກລະດັບຄວາມສາມາດໃຫ້ພະນັກງານສະຫະ ພັນກໍາມະບານແຕ່ລະຂັ້ນ ເພື່ອເຕົ້າໂຮມກໍາລັງແຮງຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ໃຫ້ເຂົ້າຮ່ວມຂະບວນການທີ່ແທ້ຈິງຂອງມະຫາຊົນຢ່າງຟົດຟື້ນ ແລະ ຕໍ່ເນື່ອງ ປະ ກອບສ່ວນເຂົ້າໃນການເຄື່ອນໄຫວ ຕ້ານປະກົດການຫຍໍ້ທໍ້ໃນສັງຄົມ ເວົ້າລວມ, ເວົ້າສະເພາະໃນຖັນແຖວສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ລວມທັງເຂົ້າຮ່ວມຕິດຕາມ, ກວດກາກາປະຕິບັດແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ຕາມພາລະບົດ ບາດຂອງຕົນດ້ວຍຄວາມຮັບຜິດຊອບສູງ; ເອົາໃຈໃສ່ການພົວພັນຮ່ວມມືກັບຕ່າງປະເທດ, ອົງການຈັດ ຕັ້ງສາກົນ ດ້ວຍຄວາມເປັນເຈົ້າການ ແລະ ມີການເລືອກເຟັ້ນຕາມແນວທາງການຕ່າງປະເທດຂອງພັກ ແລະ ລັດ ເພື່ອຍາດແຍ່ງເອົາທຶນຮອນ, ບົດຮຽນ, ເຕັກນິກວິທະຍາສາດ ເຂົ້າໃນການພັດທະນາວຽກງານກໍາມະບານ ໃຫ້ມີການຫັນປ່ຽນໃໝ່ທີ່ຕັ້ງໜ້າຢ່າງຈະແຈ້ງ

ຂໍຂອບໃຈ