ข่าวทั่วไป

ແຂວງເຊກອງ ຈະເລີນເຕີບໃຫຍ່ ແລະ ເຂັ້ມແຂງຮອບດ້ານ

ແຂວງເຊກອງ ຈະເລີນເຕີບໃຫຍ່ ແລະ ເຂັ້ມແຂງຮອບດ້ານ

66 ປີທີ່ພັກປະຊາຊົນ ປະຕິວັດລາວ ໄດ້ເອົາໃຈໃສ່ນຳພາ ແລະ ກໍ່ສ້າງໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ ທັງສາມາດຮັກສາທາດແທ້ພັກແບບໃໝ່ ທັງປີຊາສາມາດ ສະຫລາດສ່ອງໃສຊຶ່ງສົມແລ້ວທີ່ເປັນກອງ ນໍາໜ້າປະຕິວັດ ທີ່ເດັດດ່ຽວໜຽວແໜ້ນຂອງຊົນຊັ້ນກໍາມະກອນ, ຂອງປະຊາຊົນຜູ້ອອກແຮງງານ ແລະຂອງຊາດລາວ, ເປັນຜູ້ຈັດຕັ້ງ ແລະ ນໍາພາທຸກໄຊຊະນະຂອງການປະຕິວັດລາວ. 66 ປີແຫ່ງການນໍາພາ-ຊີ້ນໍາຂອງພັກປະຊາຊົນ ປະຕິວັດລາວ ເຮັດໃຫ້ປະເທດມີສະຖຽນລະພາບທາງການເມືອງ, ພື້ນຖານໂຄງລ່າງຖະໜົນຫົນທາງ, ລະບົບຕາໜ່າງໄຟຟ້າ,ນໍ້າປະປາ ແລະ ສິ່ງອໍານວຍອື່ນໆໄດ້ຮັບການພັດທະນາຂຶ້ນ,ສັງຄົມມີຄວາມສະຫງົບ, ປະຊາຊົນສາມັກຄີເປັນປຶກແຜ່ນແໜ້ນໜາພ້ອມກັນສ້າງສາພັດທະນາໃຫ້ມີຢູ່ມີກິນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ.

ສະຫາຍ ເຫລັກໄຫລ ສີວິໄລ ກຳມະການສູນກາງພັກ, ເລຂາພັກແຂວງເຊກອງ ກ່າວວ່າ: ເມື່ອກ່ອນ, ແຂວງຂອງຕົນເປັນສ່ວນໜຶ່ງຂອງແຂວງສາລະວັນ ເປັນແຂວງຕາເວັນອອກ ແລະ ໄດ້ສ້າງຕັ້ງເປັນແຂວງເຊກອງໃນວັນທີ 14 ເມສາ 1984 ໂດຍທ່ານ ໂບເຍິນ ເລຫວຽດມ່ວງ ເປັນເລຂາພັກແຂວງ, ປະ ທານອົງການປົກຄອງແຂວງ ຊຶ່ງໄລຍະນັ້ນ, ພື້ນຖານໂຄງລ່າງຕ່າງໆປະຖົມປະຖານ,

ເຮືອນມຸ້ງຫຍ້າ,ແອ້ມ ແລະ ປູໄມ້ປ່ອງ, ກົງຈັກການຈັດຕັ້ງພັກ-ລັດຍັງອ່ອນນ້ອຍ, ປະຊາຊົນດຳລົງຊີວິດຕິດພັນກັບທໍາມະຊາດ ແລະ ພື້ນຖານການຜະລິດຍັງບໍ່ທັນເຂັ້ມແຂງ. ແນວໃດກໍ່ດີນັບແຕ່ມື້ສ້າງຕັ້ງເປັນຕົ້ນມາເຫັນວ່າ: ການປ້ອງກັນຊາດ-ປ້ອງກັນຄວາມສະຫງົບນັບມື້ໜັກແໜ້ນ, ເຂັ້ມແຂງ ແລະ ທັນສະໄໝຂຶ້ນ, ກໍາລັງປະກອບອາວຸດໄດ້ຮັບການປັບປຸງເຕີບໃຫຍ່ດ້ານກົງຈັກການຈັດຕັ້ງ ກາຍເປັນປັດໄຈພື້ນຖານອໍານວຍຄວາມສະດວກໃຫ້ແກ່ການດໍາລົງຊີວິດ, ການທໍາມາຫາກິນ ແລະ ການຄ້າຂາຍຂອງປະຊາຊົນ, ເປັນເຈົ້າການຕ້ານ, ສະກັດກັ້ນ ແລະ ແກ້ໄຂໜໍ່ແໜງຄວາມບໍ່ສະຫງົບໃນສັງຄົມ ເຮັດໃຫ້ທົ່ວແຂວງມີສະຖຽນລະພາບທາງການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍ ແລະ ປະຊາຊົນສາມັກຄີປອງດອງ. ກວ່າ 30 ປີໂດຍສະ ເພາະ 5 ປີແຫ່ງການຜັນຂະຫຍາຍມະຕິ X ຂອງສູນກາງພັກ, ມະຕິ IX ຂອງອົງຄະນະພັກແຂວງ ແລະແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII, ເສດຖະກິດຂະຫຍາຍຕົວເພີ່ມຂຶ້ນຕໍ່ເນື່ອງ, ໂຄງປະ ກອບເສດຖະກິດໄດ້ຫັນປ່ຽນ ທັງສອດຄ່ອງກັບຄວາມເປັນຈິງ, ການພັດທະນາພື້ນຖານໂຄງລ່າງເສັ້ນທາງຄົມມະນາຄົມ, ລະບົບຕາໜ່າງໄຟຟ້າ, ນໍ້າປະປາຊາວບ້ານ, ໂຮງຮຽນ-ໂຮງໝໍ ແລະ ສິ່ງອໍານວຍຄວາມສະດວກອື່ນໆໄດ້ຮັບການພັດທະນາຈາກຕົວເມືອງໄປສູ່ຊົນນະບົດຫລາຍຂຶ້ນ, ຊີວິດການເປັນຢູ່ຂອງປະຊາ ຊົນໄດ້ຮັບການພັດທະນາ ແລະຫລຸດພົ້ນອອກຈາກຄວາມທຸກຍາກເທື່ອລະກ້າວ. ທີ່ພົ້ນເດັ່ນຜ່ານມາ ແມ່ນການພັດທະນາເສັ້ນທາງຄົມມະນາຄົມຂົນສົ່ງ ໂດຍແຂວງພວກເຮົາມີເສັ້ນທາງ 16A ຜ່ານໄປແຂວງອັດ ຕະປື, ເສັ້ນທາງ 16B (ເຊກອງ-ດາກຈຶງ) ອອກສູ່ຊາຍແດນຫວຽດນາມ ແລະເສັ້ນທາງຊົນນະບົດອື່ນໆ.

ສະຫາຍ ເຫລັກໄຫລ ກ່າວຕື່ມວ່າ:ເພື່ອສືບຕໍ່ເສີມຂະຫຍາຍມູນເຊື້ອຂອງພັກປະຊາຊົນປະຕິວັດລາວເຂົ້າສູ່ການປົກປັກຮັກສາ ແລະ ສ້າງສາພັດທະນາແຂວງເຊກອງໃຫ້ນັບມື້ກ້າວຂຶ້ນຢ່າງບໍ່ຢຸດຢັ້ງນັ້ນ, ພວກເຮົາຈົ່ງຍຶດໝັ້ນແນວທາງການປ່ຽນແປງໃໝ່ຮອບດ້ານ ແລະ ມີຫລັກການຂອງພັກຢ່າງເດັດດ່ຽວໜຽວແໜ້ນ ຍຶດໝັ້ນຖືເອົາການພັດທະນາເສດຖະກິດເປັນໃຈກາງຕິດແໜ້ນກັບການພັດທະສັງຄົມ, ການອະນຸລັກຮັກສາວັດທະນະທໍາທີ່ດີງາມ ແລະ ການປົກປັກຮັກສາສິ່ງແວດລ້ອມຕາມທິດຍືນຍົງ; ການຫັນລົງກໍ່ສ້າງຮາກຖານການເມືອງ,

ພັດທະນາຊົນນະບົດຮອບດ້ານ ແລະແກ້ໄຂຄວາມທຸກຍາກຂອງປະຊາຊົນຕາມ 4 ເນື້ອໃນ 4 ຄາດໝາຍ; ເພີ່ມທະວີຄວາມສາມັກຄີເປັນປຶກແຜ່ນ, ຄວາມເປັນແບບຢ່າງນໍາໜ້າ, ຄວາມສາມາດນໍາພາ ແລະ ກໍາລັງແຮງຂອງຄະນະພັກແຕ່ລະຂັ້ນ; ເຊີດຊູບົດບາດການເປັນແບບຢ່າງນໍາໜ້າຕໍ່ສູ້ຂອງສະມາຊິກພັກ, ພະນັກງານລັດຖະກອນ, ເດັດດ່ຽວແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນການຈັດຕັ້ງພັກ-ລັດ ກໍ່ຄືຖັນແຖວສະມາຊິກພັກ-ພະນັກງານຢ່າງເປັນເຈົ້າການແນໃສ່ພ້ອມກັນພັດທະນາແຂວງເຊກອງໃຫ້ນັບມື້ຈະເລີນຮຸ່ງເຮືອງ ແລະ ກ້າວໜ້າຂະຫຍາຍຕົວຢ່າງບໍ່ຢຸດຢັ້ງ.

ຂໍຂອບໃຈ