ข่าวทั่วไป

ແຂວງອັດຕະປື ຫວນຄືນມູນເຊື້ອວັນ ສ້າງຕັ້ງກໍາມະບານລາວ ຄົບຮອບ 65 ປີ

ແຂວງອັດຕະປື ຫວນຄືນມູນເຊື້ອວັນ
ສ້າງຕັ້ງກໍາມະບານລາວ ຄົບຮອບ 65 ປີ

ຂປລ.ວັນທີ 1 ກຸມພາ 2021 ນີ້, ແຂວງອັດຕະປື ໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງກຳມະບານລາວ ຄົບຮອບ 65 ປີ ຄື: ວັນທີ 1 ກຸມພາ ປີ 1956 ຫາ 1 ກຸມພາ ປີ 2021 ຂຶ້ນທີ່ຫໍປະຊຸມໃຫຍ່ຂອງແຂວງ ໂດຍໃຫ້ກຽດປາຖະກະຖາຂອງທ່ານ ບຸນໂຮມ ພົມມະສານ ຄະນະປະຈໍາພັກແຂວງ ປະທານແນວລາວສ້າງຊາດ ແຂວງອັດຕະປື, ເຂົ້າຮ່ວມຮັບຟັງມີການນໍາຂອງແຂວງ, ພະນັກງານອາວຸໂສບໍານານ,ໜ່ວຍກໍາມະບານອ້ອມຂ້າງ ແລະ ກໍາມະບານຈາກລັດວິສາຫະກິດ, ຕະຫລອດຮອດສະມາຊິກກໍາມະບານເຂົ້າຮ່ວມ .

ທ່ານ ບຸນໂຮມ ພົມມະສານ ໄດ້ຍົກໃຫ້ເຫັນປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງສະຫະພັນກຳມບານລາວ ໄດ້ສ້າງຕັ້ງຂຶ້ນໃນວັນທີ 1 ກຸມພາ 1956 ເຊິ່ງມີໜ້າທີ່ຕົ້ນຕໍໃນການໂຄສະນາຂົນຂວາຍ, ເຕົ້າໂຮມກຳມະກອນຊາວຜູ້ອອກແຮງງານບັນດາເຜົ່າ ໃຫ້ມີຄວາມຕື່ນຕົວ ມີນໍ້າໃຈຮັກຊາດ,

ເສີມຂະຫຍາຍປະຊາທິປະໄຕ, ມີລະບຽບແບບແຜນ, ເປັນພົນລະເມືອງດີຂອງຊາດ,ສົ່ງ ເສີມໃຫ້ມີວຽກເຮັດງານທຳ ແລະ ເປັນຕົວແທນຂອງຊາວຜູ້ອອກແຮງງານ ໃນການປົກປ້ອງສິດຜົນ ປະໂຫຍດ ພ້ອມທັງເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ຕາມການຊີ້ນໍາຂອງພັກ. ນັບແຕ່ມື້ສ້າງຕັ້ງ ຈົນເຖິງປັດຈຸບັນ ສະຫະພັນກຳມະບານລາວ ຍາມໃດກໍໄດ້ຮັບທິດຊີ້ນຳຈາກກົມການເມືອງສູນກາງພັກ, ຄະນະເລຂາທິການສູນກາງພັກ ຢ່າງໃກ້ຊິດຕິດແທດຕະຫລອດມາ ແລະ ໄດ້ຕີລາຄາສູງໃນການເຄື່ອນໄຫວຂອງອົງການຈັດຕັ້ງກຳມະບານລາວ ໃນນາມເປັນຕົວແທນແຫ່ງການປົກປ້ອງສິດຜົນປະໂຫຍດອັນຊອບທຳ ຂອງຊົນຊັ້ນຊາວຜູ້ອອກແຮງງານ ແລະ ກຳມະກອນລາວ.
ພ້ອມນີ້ ທ່ານ ບຸນໂຮມ ພົມມະສານ ຍັງໄດ້ຮຽກຮ້ອງມາຍັງພະນັກງານ-ລັດຖະກອນ, ສະມາຊິກກໍາມະບານທຸກສະຫາຍ ຕ້ອງສຸມໃສ່ກໍ່ສ້າງຊົນຊັ້ນກຳມະກອນ ແລະ ຊາວຜູ້ອອກແຮງງານ ໃຫ້ກາຍເປັນກຳລັງຜະລິດທີ່ມີລັກສະນະອຸດສະຫະກຳ ແລະ ທັນສະໄໝ, ເອົາໃຈໃສ່ກໍ່ສ້າງກຳລັງແຮງທີ່ມີພູມປັນຍາຄວາມຮູ້-ຄວາມສາມາດ ນຳໃຊ້ເຂົ້າໃນການປະຕິບັດວຽກງານໃຫ້ປະກົດຜົນເປັນຈິງ, ຍົກສູງຄວາມຮູ້ດ້ານວິ ຊາສະເພາະ, ວິຊາຊີບ ແລະ ມີສະຕິເປັນເຈົ້າ ໂດຍຕິດພັນກັບຂໍ້ແຂ່ງຂັນ 5 ເປັນເຈົ້າ ໂດຍສະເພາະແມ່ນຂະບວນກຳມະບານລາວ ໃນພາລະກິດຕໍ່ສູ້ປົດປ່ອຍປະເທດຊາດ ແລະ ສ້າງສາພັດທະນາປະເທດຊາດ ໃຫ້ນັບມື້ຮຸ່ງເຮືອງຂຶ້ນເປັນກ້າວໆ. ໂອກາດດັ່ງກ່າວໃນພິທີຍັງໄດ້ຈັດກິດຈະກຳບໍລິຈາກເລືອດໂດຍບໍ່ຫວັງສິ່ງຕອບແທນຂອງ ສະມາຊິກກຳມະບານອ້ອມຂ້າງແຂວງ ຢ່າງເປັນຂະບວນຟົດຟື້ນ .

ຂໍຂອບໃຈ