ข่าวทั่วไป

ເຮັດແທ້! ນະຄອນປາກເຊ ຢຶດ ແລະ ເຮັດບົດບັນທຶກກັບຜູ້ຂາຍຊີ້ນເກີນລາຄາ

ເຮັດແທ້! ນະຄອນປາກເຊ ຢຶດ ແລະ ເຮັດບົດບັນທຶກກັບຜູ້ຂາຍຊີ້ນເກີນລາຄາ

ທ່ານ ປະລິນຍາເອກ ບຸນຍະເດດ ທອງສະຫວັນ ກໍາມະການພັກແຂວງ ຫົວໜ້າພະແນກອຸດສາຫະກຳ ແລະ ການຄ້າແຂວງຈຳປາສັກ ໃຫ້ສໍາພາດວ່າ: ປັດຈຸບັນ

ນອກຈາກເຄື່ອນໄຫວກວດກາການນໍາເຂົ້າ ແລະ ຈໍາໜ່າຍ ອາຫານທະເລ ສົດ ແລະ ແຊ່ແຂງແລ້ວ ພະແນກອຸດສາຫະກໍາ ແລະ ການຄ້າແຂວງພວກເຮົາ ຍັງໄດ້ເອົາໃຈໃສ່ວຽກງານການຄຸ້ມຄອງ-ກວດກາ ການຊື້-ຂາຍ ຊີ້ນໝູ ແລະ ສິນຄ້າອຸປະໂພກ-ບໍລິໂພກ ທີ່ມີຜົນປະທົບໄວ ຕໍ່ຊິວິດການເປັນຢູ່ຂອງພະນັກງານ, ລັດຖະກອນ, ທະຫານ, ຕໍາຫຼວດ ແລະ ພໍ່ແມ່ປະຊາຊົນ ໂດຍຊຸກຍູ້-ແນະນໍາໃຫ້ເຈົ້າໜ້າທີ່ກວດກາການຄ້າ ລົງເຄື່ອນໄກວຕິດຕາມກວດກາຢູ່ຕາມຕະຫຼາດແຫ່ງຕ່າງໆໃນເທດສະບານແຂວງ. ພ້ອມນີ້ ຍັງໄດ້ອອກແຈ້ງການແນະນໍາໃຫ້ເຈົ້າໜ້າທີ່ກວດກາການຄ້າ ຫ້ອງການອຸດສາຫະກໍາ ແລະ ການຄ້າ 9 ເມືອງ, 1 ນະຄອນ ເອົາໃຈໃສ່ເຄື່ອນໄຫວກວດກາ ແລະ ຄຸ້ມຄອງລາຄາສິນຄ້າດັ່ງກ່າວ ຢ່າງເຂັ້ມງວດ, ຖ້າພົບເຫັນຜູ້ຝ່າຝືນ ກໍໃຫ້ດໍາເນີນຄະດີ ຕາມລະບຽບການທີ່ວາງອອກ ຢ່າງເຄັ່ງຄັດ.

ໃນຕອນບ່າຍວັນທີ 5 ມັງກອນ 2021, ເຈົ້າໜ້າທີ່ກວດກາການຄ້າ ພະແນກອຸດສາຫະກຳ ແລະ ການຄ້າແຂວງຈຳປາສັກ ກໍໄດ້ຮ່ວມກັບຕຳຫຼວດເສດຖະກິດ ກອງບັນຊາການ ປກສ ແຂວງ ໄດ້ລົງເຄື່ອນໄຫວກວດກາການຊື້-ຂາຍຊິ້ນໝູ ຢູ່ຕະຫຼາດໃໝ່ປາກເຊ ນະຄອນປາກເຊ. ໃນໂອກາດນີ້ ໄດ້ກວດພົບຜູ້ທີ່ຂາຍຊີ້ນໝູ 50.000 ກີບ/ກິໂລກຼາມ 1 ຮ້ານ ເຊິ່ງເກີນກ່ວາລາຄາທີ່ພະແນກອຸດສາຫະກຳ ແລະ ການຄ້າແຂວງ ກຳນົດອອກ ເຊິ່ງເຈົ້າໜ້າທີ່ໄດ້ກັກຢຶດຊີ້ນໝູ ພ້ອມທັງສ້າງບົດບັນທຶກ, ສຶກສາອົບຮົມ ຜູ້ລະເມີດຕາມລະລຽບການ.

ສຳລັບລາຄາຂາຍຊີ້ນໝູໃນລາຄາຕະຫຼາດທີ່ກຳນົດແມ່ນ: ລາຄາ 40.000-45.000 ກີບ/ກິໂລກຼາມ, ລາຄາຊື້-ຂາຍໝູເປັນ ໜ້າຟາມ ສູງສຸດບໍ່ໃຫ້ເກີນ 25.000 ກີບ/ກິໂລກຼາມ. ລາຄາຂາຍຍົກໝູທັງໂຕທີ່ໄດ້ຂ້າ, ຄົວ ແລະ ຊໍາແຫຼະແລ້ວ ສູງສຸດບໍ່ໃຫ້ເກີນ 31.000 ກີບ/ກິໂລກຼາມ. ລາຄາຊີ້ນໝູລວມຢູ່ຕະຫຼາດທົ່ວໄປ(ຂອດລູກຂຽງ) ສູງສຸດບໍ່ໃຫ້ເກີນ 34.000 ກີບ/ກິໂລກຼາມ. ລາຄາຊີ້ນໝູປະເພດໜຶ່ງ ສູງສຸດບໍ່ໃຫ້ເກີນ 45.000 ກີບ/ກິໂລກຼາມ. ລາຄາຊີ້ນໝູປະເພດສອງ ສູງສຸດບໍ່ໃຫ້ເກີນ 40.000 ກີບ/ກິໂລກຼາມ

ຂໍຂອບໃຈ