ข่าวทั่วไป

ເມືອງພູວົງຍ່າງເພື່ອສຸຂະພາບ ໂອກາດວັນ ສ້າງຕັ້ງກໍາມະບານລາວ ຄົບຮອບ 65 ປີ

ເມືອງພູວົງຍ່າງເພື່ອສຸຂະພາບ ໂອກາດວັນ
ສ້າງຕັ້ງກໍາມະບານລາວ ຄົບຮອບ 65 ປີ

ຂປລ.ວັນທີ 2 ກຸມພາ 2021 ນີ້, ເມືອງພູວົງ ແຂວງອັດຕະປື ໄດ້ສ້າງຂະບວນການຍ່າງເພື່ອສຸຂະພາບ ເນື່ອງໃນໂອກາດວັນສ້າງຕັ້ງກຳມະບານລາວ ຄົບຮອບ 65 ປີ ວັນທີ 1 ກຸມພາ ປີ 1956 ຫາ 1 ກຸມພາ ປີ 2021 ຂຶ້ນທີ່ເດີ່ນຫ້ອງວ່າການເມືອງ, ໂດຍການເຂົ້າຮ່ວມທ່ານ ຄຳໃບ ແກ້ວມະນີ ຮອງເລຂາພັກເມືອງ, ປະທານກວດກາພັກ-ລັດ ເມືອງພູວົງ,ມີການນໍາຂອງເມືອງ, ພ້ອມດ້ວຍໜ່ວຍກໍາມະບານອ້ອມຂ້າງ, ຕະຫລອດຮອດສະມາຊິກກໍາມະບານ ເຂົ້າຮ່ວມ.ຂະບວນການຍ່າງເພື່ອສຸຂະພາບຄັ້ງນີ້ ໄດ້ເລີ່ມເຄື່ອນອອກຈາກ ເດີ່ນຫ້ອງວ່າການເມືອງ ແລະ ສືບຕ່ໍ່ຍ່າງອ້ອມຕາມເສັ້ນທາງເທດສະບານເມືອງ ແລ້ວກັບເຂົ້າ ສູ່ເດີ່ນຫ້ອງວ່າການປົກຄອງເມືອງ ລວມໄລຍະທາງການຍ່າງ 3 ກິໂລແມັດ. ຈາກນັ້ນຄະນະບໍລິຫານສະຫະພັນກຳມະບານ ເມືອງພູວົງ ແລະ ສະມາຊິກກຳມະບານ ກໍ່ໄດ້ເຂົ້າຮ່ວມຮັບຟັງປາຖະກາຖາປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງສະຫະພັນກຳມບານລາວ ໂດຍເປັນກຽດປາຖະກາຖາຂອງທ່ານ ຄຳໃບ ແກ້ວມະນີ ເຊິ່ງທ່ານໃຫ້ຮູ້ວ່າ: ພາຍຫລັງທີ່ອົງການກໍາມະບານລາວໄດ້ສ້າງຕັ້ງຂຶ້ນໃນວັນທີ 1 ກຸມພາ 1956 ເປັນຕົ້ນມາ ສະຫະພັນກຳມະບານລາວ ກໍ່ໄດ້ປະຕິບັດໜ້າທີ່ຕົ້ນຕໍໃນການໂຄສະນາຂົນຂວາຍ, ເຕົ້າໂຮມກຳມະກອນຊາວຜູ້ອອກແຮງງານບັນດາເຜົ່າ ໃຫ້ມີຄວາມຕື່ນຕົວ ມີນໍ້າໃຈຮັກຊາດ, ເສີມຂະຫຍາຍປະຊາທິປະໄຕ, ມີລະບຽບແບບແຜນ, ເປັນພົນລະເມືອງດີຂອງຊາດ, ສົ່ງເສີມໃຫ້ມີວຽກເຮັດງານທຳ ແລະ ເປັນຕົວແທນຂອງຊາວຜູ້ອອກແຮງງານໃນການປົກປ້ອງສິດຜົນປະໂຫຍດ ພ້ອມທັງເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ຕາມການຊີ້ນໍາຂອງພັກ .ພ້ອມນີ້ທ່ານຍັງໄດ້ຮຽກຮ້ອງມາຍັງສະມາຊິກກໍາມະບານທຸກສະຫາຍ ຕ້ອງສຸມໃສ່ກໍ່ສ້າງຊົນຊັ້ນກຳມະກອນ ແລະ ຊາວຜູ້ອອກແຮງງານ ໃຫ້ກາຍເປັນກຳລັງການຜະລິດທີ່ມີລັກສະນະອຸດສະຫະກຳ ແລະ ທັນສະໄໝ, ເອົາໃຈໃສ່ກໍ່ສ້າງກຳລັງແຮງທີ່ມີພູມປັນຍາຄວາມຮູ້-ຄວາມສາມາດ ນຳໃຊ້ເຂົ້າໃນການປະຕິບັດວຽກງານໃຫ້ປະກົດຜົນເປັນຈິງ, ຍົກສູງຄວາມຮູ້ດ້ານວິຊາສະເພາະ, ວິຊາຊີບ ແລະ ມີສະຕິ ປະຕິບັດຂໍ້ແຂ່ງຂັນ 5 ເປັນເຈົ້າ ຕິດພັນກັບການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະ ການພັດທະນາເສດຖະກິດ – ສັງຄົມຂອງ ເມືອພູວົງ ໃຫ້ນັບມື້ນັບເຂັ້ມແຂງ ແລະ ມີຄວາມຮຸ່ງເຮືອງຂຶ້ນເປັນກ້າວໆ. .

ຂໍຂອບໃຈ