ข่าวทั่วไป

ເຈົ້າແຂວງຈຳປາສັກ ເຄື່ອນໄຫວ ວຽກງານຢ້ຽມຢາມກອງພົນທີ 5

ເຈົ້າແຂວງຈຳປາສັກ ເຄື່ອນໄຫວ
ວຽກງານຢ້ຽມຢາມກອງພົນທີ 5

ຂປລ. ໃນວັນທີ 9 ມີນາ 2021 ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງຈຳປາສັກ ໄດ້ເຄື່ອນໄຫວຢ້ຽມຢາມ ກອງພົນທີ 5, ໂດຍມີ ທ່ານ ພົນຈັດຕະວາ ສຸໄກ ພິມມະສານ ຫົວໜ້າການທະຫານ ກອງບັນຊາການທະຫານແຂວງຈໍາປາສັກ, ທ່ານ ສະນັ່ນ ສີພາພົມມະຈັນ ຫົວໜ້າຄະນະຈັດຕັ້ງແຂວງ, ທ່ານ ສຸປານີ ສິລິປຸນໂຍ ຫົວໜ້າຄະນະໂຄສະນາອົບຮົມແຂວງ, ມີ ທ່ານ ພຶດສະພາ ພູມມະສັກ ປະທານບໍລິສັດ ເອເຊຍລົງທຶນພັດທະນາ ແລະ ກໍ່ສ້າງ ຈໍາກັດ ຜູ້ດຽວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ, ໂດຍການຕ້ອນຮັບຂອງ ທ່ານ ພົນຈັດຕະວາ ວັນທອງ ບຸດຕະວົງ ຫົວໜ້າການທະຫານກອງພົນ ທະຫານຮາບທີ V ພ້ອມດ້ວຍຄະນະພັກ-ຄະນະບັນຊາ, ນາຍ ແລະ ພົນທະຫານ ຂອງກອງພົນທີ V.

ການມາເຄື່ອນໄຫວຢ້ຽມຢາມ ກອງພົນທະຫານຮາບທີ 5 ໃນເທື່ອນີ້, ກໍ່ເພື່ອເພີ່ມທະວີຄວາມສາມັກຄີຮັກແພງ ລະຫວ່າງຄະນະພັກ-ອົງການປົກຄອງແຂວງ ແລະ ກຳລັງປ້ອງກັນຊາດ ທັງສູນກາງ ແລະ ທ້ອງຖິ່ນ ແລະ ຮູ້ບຸນຄູນໄປຍັງບັນດາພະນັກງານ, ສະມາຊິກພັກ, ນັກຮົບໃນທົ່ວກອງທັບທີ່ເສຍ ສະຫລະ ເພື່ອປົກປ້ອງຄວາມເປັນເອກະລາດຂອງຊາດ, ປົກປ້ອງລະບອບປະຊາທິປະໄຕ ປະຊາຊົນ ແລະ ຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.

ໂອກາດດັ່ງກ່າວ, ທ່ານ ວິໄລວົງ ບຸດດາຄໍາ ກໍ່ໄດ້ຕາງໜ້າໃຫ້ຄະນະນໍາ ກ່າວສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ຜົນງານ ທີ່ບັນດາກົມກອງຍາດມາໄດ້ ພ້ອມທັງອວຍພອນໄຊອັນປະ ເສີດແກ່ນາຍ ແລະ ພົນທະຫານ ກອງພົນທະຫານຮາບທີ 5 ຈົ່ງມີສຸຂະພາບແຂງແຮງ ມີພາລະນາໄມສົມບູນ ສືບຕໍ່ເຮັດໃຫ້ສຳເລັດໜ້າທີ່ອັນມີກຽດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ແຂວງຈຳປາສັກ ພ້ອມກັນສືບຕໍ່ເສີມຂະຫຍາຍທາດແທ້ ແລະ ມູນເຊື້ອກອງທັບປະຊາຊົນລາວ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ພ້ອມກັນຢຶດໝັ້ນເສັ້ນທາງ, ຈຸດ ໝາຍ ແລະ ອຸດົມການສັງຄົມນິຍົມ.

ໂອກາດຢ້ຽມຢາມກອງພົນທີ 5 ເທື່ອນີ້, ທ່ານ ວິໄລວົງ ບຸດດາຄໍາ ໄດ້ມອບເງິນສົດຈຳນວນ 20 ລ້ານກີບ. ນອກນັ້ນ, ທ່ານ ພຶດສະພາ ພູມມະສັກ ປະທານບໍລິສັດ ເອເຊຍລົງທຶນພັດທະນາ ແລະ ກໍ່ສ້າງ ຈໍາກັດ ຜູ້ດຽວ ໄດ້ມອບພາຫະນະ (ລົດຈັກວິບາກ) ຈຳນວນ 5 ຄັນ ມູນຄ່າ 350 ລ້ານກີບ ໃຫ້ກອງພົນທະຫານຮາບທີ 5 ເພື່ອນໍາໃຊ້ເຂົ້າໃນວຽກງານ. ກ່າວຮັບໂດຍ, ທ່ານ ພົນຈັດຕະວາ ວັນທອງ ບຸດຕະວົງ ຫົວໜ້າ ການທະຫານ ກອງພົນທະຫານຮາບທີ V, ໂດຍມີພາກສ່ວນກ່ຽວຂ້ອງ ເຂົ້າຮ່ວມ ເປັນສັກຂີພິຍານ.

ຂໍຂອບໃຈ