ข่าวทั่วไป

ສປປ ລາວ ພົບຄົນຕິດເຊື້ອໂຄວິດ-19 ເພີ່ມອີກ 4 ຄົນ

ສປປ ລາວ ພົບຄົນຕິດເຊື້ອໂຄວິດ-19 ເພີ່ມອີກ 4 ຄົນ

ຂປລ. ໃນວັນທີ 17 ເມສາ 2021 ຢູ່ກະຊວງສາທາລະນະສຸກ ທ່ານ ດຣ. ຣັດຕະນະໄຊ ເພັດສຸ ວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ໃນວັນທີ 16 ມີນາ 2021 ການເຝົ້າລະວັງຮອດ 5 ໂມງແລງ ໄດ້ເກັບຕົວຢ່າງມາກວດວິເຄາະທັງໝົດ 369 ຄົນ ແລະ ໄດ້ແທກອຸນຫະພູມຮ່າງກາຍ, ໃນຈຳນວນຕົວຢ່າງທີ່ນຳມາກວດວິເຄາະ ໄດ້ພົບຄົນຕິດເຊື້ອໂຄວິດ-19 ອີກ 4 ຄົນ, ລາຍລະອຽດມີດັ່ງນີ້, ກໍລະນີຜູ້ຕິດເຊື້ອລາຍທີ 55 ເພດຍິງ, ອາຍຸ 25 ປີ, ສັນ ຊາດລາວ, ອາຊີບ ແມ່ບ້ານ ເຮັດວຽກຢູ່ບາງກອກ ປະເທດໄທ ທີ່ຢູ່ປັດຈຸບັນ ເມືອງຫີນບູນ ແຂວງຄຳມ່ວນ. ປະຫວັດການເຄື່ອນໄຫວ: ວັນທີ 14 ເມສາ 2021 ຜູ້ກ່ຽວ ແລະ ລູກສາວ ຂຶ້ນລົດໂດຍສານ ຢູ່ບາງກອກ ປະເທດໄທ, ມີຜູ້ໂດຍສານທັງໝົດ 9 ຄົນ (ລວມທັງຜູ້ກ່ຽວ ແລະ ລູກສາວ) ມາສະຖານີຂົນ ສົ່ງນະຄອນພະນົມ. ມາຮອດ ສປປ ລາວ ຜ່ານດ່ານ ຂົວມິດຕະພາບແຫ່ງທີ 3 (ເຂົ້າມາຖືກຕາມລະບຽບຫລັກການ) ແລະ ຖືກຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ ໃນເມືອງທ່າແຂກ. ມາຮອດວັນທີ 16 ເມສາ 2021 ຜົນກວດວິເຄາະພົບເຊື້ອ COVID-19, ປັດຈຸບັນ ຜູ້ກ່ຽວເຂົ້ານອນແຍກປ່ຽວ, ຕິດ ຕາມອາການ ແລະ ຮັບການປິ່ນປົວຢູ່ໂຮງໝໍ.

ສຳລັບກໍລະນີຜູ້ຕິດເຊື້ອ ລາຍທີ 56 ເພດຊາຍ, ອາຍຸ 32 ປີ, ສັນຊາດລາວ, ອາຊີບ ຂາຍເຄື່ອງນອນ ຢູ່ແຖວວົງວຽນໃຫຍ່ ບາງກອກ, ປະເທດໄທ. ກ່ອນເດີນທາງເຂົ້າມາ ສປປ ລາວ ບໍ່ໄດ້ກວດຊອກຫາເຊື້ອ COVID-19. ປະຫວັດການເຄື່ອນໄຫວ ວັນທີ 7 ເມສາ 2021 ອອກເດີນທາງຈາກບາງກອກ ປະເທດໄທ ດ້ວຍລົດໂດຍສານຈາກສະຖານີໝໍຊິດ ເວລາ 19:00 ໂມງ, ຕະຫລອດໄລຍະການເດີນທາງ ຜູ້ກ່ຽວໃສ່ຜ້າອັດປາກ-ດັງ ຕະຫລອດເວລາ. ວັນທີ 8 ເມສາ 2021 ເດີນທາງມາຮອດ ແຂວງມຸກດາຫານ ເວລາ 5:00 ໂມງເຊົ້າ ມີຜູ້ໂດຍສານຮ່ວມເດີນທາງທັງໝົດ 32 ຄົນ. ຂ້າມດ່ານ ຂົວມິດຕະພາບແຫ່ງທີ 2 ແລະ ມາຮອດແຂວງສະຫວັນນະເຂດ ເວລາ 8:00 ໂມງເຊົ້າ (ເຂົ້າມາຖືກຕາມລະບຽບຫລັກການ) ພ້ອມດຽວກັນ ກໍ່ຖືກສົ່ງເຂົ້າສູນຈຳກັດບໍລິເວນທີ່ຄະນະສະເພາະກິດກຳນົດໄວ້ ໃນນະຄອນໄກສອນ. ຜູ້ກ່ຽວຮູ້ສຶກເຈັບຫົວ ໄດ້ກິນຢາປາຣາ, ອາການດີຂຶ້ນ ແລະ ໄດ້ຖືກເກັບຕົວຢ່າງກວດຫາເຊື້ອ, ຜົນກວດແມ່ນບໍ່ພົບເຊື້ອ COVID-19. ມາຮອດວັນທີ 14 ເມສາ 2021 ເວລາ 13:45 ໂມງ ຜູ້ກ່ຽວໄດ້ຈ້າງລົດສາມລໍ້ ມາຄິວລົດສະຫວັນນະເຂດ ນັ່ງມານຳກັນ 4 ຄົນ (ລວມທັງຜູ້ກ່ຽວ), ໃນນັ້ນ 1 ຄົນ ຢູ່ເມືອງສອງຄອນ, ທີ່ເຫລືອບໍ່ຮູ້ວ່າມາຈາກເມືອງໃດ, ແລະ ຫລານຜູ້ກ່ຽວມາຮັບຢູ່ຄິວລົດປາກຊ່ອງ ແລະ ມາຮອດເຮືອນ ເວລາ 17:00 ໂມງ, ຫລັງຈາກນັ້ນ 1 ຊົ່ວໂມງຕໍ່ມາ ຜູ້ກ່ຽວຮູ້ສຶກໄຂ້ ຈຶ່ງກິນຢາປາຣາໃສ່. ໃນໄລຍະຢູ່ເຮືອນ ມີຄົນມາຫາ 3 ຄົນ ແລະ ໄດ້ກິນເຂົ້າຮ່ວມກັນ ແລະ ວັນທີ 16 ເມສາ 2021 ໄດ້ເກັບຕົວຢ່າງກວດຊອກຫາເຊື້ອອີກຄັ້ງ, ຜົນກວດວິເຄາະພົບເຊື້ອ COVID-19 ປັດຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວ.
ສຳລັບກໍລະນີຜູ້ຕິດເຊື້ອລາຍທີ 57 ເພດຊາຍ, ອາຍຸ 24 ປີ, ສັນຊາດລາວ, ອາຊີບ ເຮັດຮ້ານອາຫານ ຢູ່ເຂດລາມກຳແຫງລາດພ້າວ ປະເທດໄທ. ທີ່ຢູ່ປັດຈຸບັນ ເມືອງສອງຄອນ ແຂວງສະຫວັນນະເຂດ ກ່ອນເດີນທາງເຂົ້າມາ ສປປ ລາວ ບໍ່ໄດ້ກວດຊອກຫາເຊື້ອ COVID-19. ປະຫວັດການເຄື່ອນ ໄຫວ ວັນທີ 14 ເມສາ 2021 ເວລາ 19:00 ໂມງ ເດີນທາງອອກຈາກບາງກອກ ປະເທດໄທ ພ້ອມດ້ວຍໝູ່ 1 ຄົນ (ເປັນຄົນແຂວງສະຫວັນນະເຂດ) ດ້ວຍລົດໂດຍສານຢູ່ສະຖານີລົດໝໍຊິດ, ມີຜູ້ໂດຍສານຮ່ວມເດີນທາງ 28 ຄົນ. ມາຮອດວັນທີ 15 ເມສາ 2021 ມາຮອດມຸກດາຫານ ເວລາ 06:30 ໂມງເຊົ້າ ແລະ ຂ້າມດ່ານມາແຂວງສະຫວັນນະເຂດ (ເຂົ້າມາຖືກຕາມລະບຽບຫລັກການ). ຜູ້ກ່ຽວມີໄອ, ເຈັບຄໍ ແລະ ກິນອາຫານບໍ່ຮູ້ລົດຊາດ. ໄດ້ເກັບຕົວຢ່າງກວດຫາເຊື້ອ ແລະ ຖືກສົ່ງໄປຈຳກັດບໍລິເວນຢູ່ສູນທີ່ຄະ ນະສະເພາະກິດກຳນົດໄວ້ ໃນນະຄອນໄກສອນ ແລະ ວັນທີ 16 ເມສາ 2021 ຜົນກວດວິເຄາະ ພົບເຊື້ອ COVID-19 ປັດຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນປົວຢູ່ໂຮງໝໍ.

ສຳລັບກໍລະນີຜູ້ຕິດເຊື້ອ ລາຍທີ 58 ເພດຍິງ, ອາຍຸ 25 ປີ, ສັນຊາດ ລາວ, ອາຊີບ ແມ່ບ້ານ ເຮັດວຽກຢູ່ເມືອງສີລາຊາ ແຂວງຊົນບູລີ ປະເທດໄທ. ທີ່ຢູ່ປັດຈຸບັນ ເມືອງບໍລິຄັນ ແຂວງບໍລິຄຳໄຊ. ປະ ຫວັດການເຄື່ອນໄຫວ ວັນທີ 6 ເມສາ 2021 ຂຶ້ນຍົນຈາກສະໜາມບິນສົງຂາ ມາຫາ ສະໜາມບິນອຸດອນ ແລະ ຂຶ້ນລົດແທັກຊີ (ໃນລົດມີ 4 ຄົນ, ຄົນຂັບລົດ, ໝູ່ 2 ຄົນ ແລະ ຜູ້ກ່ຽວ) ມານອນຢູ່ລີສອດບຶງການ ປະເທດໄທ. ວັນທີ 6-13 ເມສາ 2021 ພັກຢູ່ລີສອດບຶງການ ປະເທດໄທ ແລະ ວັນທີ 14 ເມສາ 2021 ຜູ້ກ່ຽວໄດ້ໃຫ້ພີ່ນ້ອງເອົາລົດສ່ວນຕົວມາສົ່ງຂຶ້ນເຮືອ (ໃນລົດມີພີ່ນ້ອງ 1 ຄົນ ແລະ ຕົນເອງ). ເວ ລາ 06:00 ໂມງເຊົ້າ ຜູ້ກ່ຽວມາຂຶ້ນເຮືອຢູ່ເຂດບຶງການ ໂດຍມີຜູ້ຂັບເຮືອຈາກຝັ່ງລາວ ຂ້າມມາຮັບ ເພື່ອມາສົ່ງຢູ່ເຂດເມືອງປາກກະດິງ. ເວລາ 8:00 ໂມງເຊົ້າ ຜູ້ຂັບເຮືອຈອດລົດໄວ້ທ່າປາກກະດິງ ແລະ ເມຍຜູ້ຂັບເຮືອຂີ່ລົດຈັກຮັບເອົາຜູ້ຕິດເຊື້ອນ້ຳເບີ 58 ໄປພັກຢູ່ບ້ານຂອງຕົນຊົ່ວຄາວ. ຫລັງຈາກນັ້ນ, ຜູ້ກ່ຽວກໍ່ໄດ້ຂຶ້ນລົດວີໂກນຳເຈົ້າຂອງເຮືອ ໂດຍມີລູກເຈົ້າຂອງເຮືອ ອາຍຸ 4 ປີ ນັ່ງໄປນຳ ແລະ ໄດ້ໄປສົ່ງຜູ້ກ່ຽວຮອດ ເມືອງບໍລິຄັນ ເຊິ່ງມີພໍ່ຜູ້ກ່ຽວຂີ່ລົດຈັກມາລໍຖ້າ ແລະ ພາໄປສູນຈຳກັດບໍລິເວນ ທີ່ຄະນະສະເພາະກິດກຳນົດໄວ້. ວັນທີ 15 ເມສາ 2021 ຖືກເກັບຕົວຢ່າງມາກວດຫາເຊື້ອ, ມາຮອດວັນທີ 16 ເມສາ 2021 ຜົນກວດວິເຄາະພົບເຊື້ອ COVID-19 ປັດຈຸບັນ ເຂົ້ານອນແຍກປ່ຽວ, ຕິດຕາມອາການ ແລະ ຮັບການປິ່ນ ປົວຢູ່ໂຮງໝໍ. ສຳລັບກຸ່ມສໍາຜັດໃກ້ຊິດໃນເບື້ອງຕົ້ນ ມີ 04 ຄົນ, ພວກເຮົາໄດ້ເກັບຕົວຢ່າງມາກວດວິເຄາະ, ປັດຈຸບັນຍັງລໍຖ້າຜົນກວດ. ພ້ອມດຽວກັນ ພວກເຮົາຍັງໄດ້ສືບຕໍ່ເຝົ້າລະວັງ, ຕິດຕາມອາການພວກກ່ຽວ ແລະ ຈຳກັດບໍລິເວນຜູ້ສຳຜັດໃກ້ຊິດຈົນຄົບ 14 ວັນ. ປັດຈຸບັນ, ຄົນເຈັບຕິດເຊື້ອໂຄວິດ-19 ຍັງນອນຕິດຕາມປິ່ນປົວຢູ່ໂຮງໝໍ ຈຳນວນ 09 ຄົນ (04 ໃໝ່), ໃນນັ້ນ: ຢູ່ນະຄອນຫລວງວຽງຈັນ 3 ຄົນ (ໂຮງໝໍມິດຕະພາບ) ແຂວງຈຳປາສັກ 1 ຄົນ; ແຂວງສາລະວັນ 1 ຄົນ; ແຂວງສະຫວັນນະເຂດ 2 ຄົນ (ໃໝ່); ແຂວງຄຳມ່ວນ 1 ຄົນ (ໃໝ່) ແລະ ແຂວງບໍລິຄຳໄຊ 1 ຄົນ (ໃໝ່), ທຸກຄົນ ແມ່ນມີສຸຂະພາບຮ່າງກາຍຈິດໃຈສົມບຸນ ແລະ ແຂງແຮງດີ.
ທ່ານ ດຣ. ຣັດຕະນະໄຊ ເພັດສຸວັນ ໄດ້ກ່າວວ່າ: ທັງໝົດແມ່ນມາຈາກແຮງງານລາວ ທີ່ເຂົ້າມາ ສປປ ລາວ ໃນໄລຍະປີໃໝ່ ຈາກປະເທດເພື່ອນບ້ານ ທີ່ກຳລັງມີການລະບາດຮອບໃໝ່ພາຍໃນປະເທດ. ພວກເຮົາເຫັນໄດ້ວ່າ ມີຈຳນວນໜຶ່ງແມ່ນເຂົ້າມາໂດຍບໍ່ຖືກກົດໝາຍ ເຊິ່ງສົ່ງຜົນໃຫ້ເກີດມີຄວາມສ່ຽງ ແລະ ຜົນກະທົບທີ່ຕາມມາ. ດັ່ງນັ້ນ, ຕໍ່ກັບສະພາບການດັ່ງກ່າວ ທີ່ໂລກ ແລະ ປະເທດອ້ອມຂ້າງ ຍັງມີກໍລະນີ ໃໝ່ທຸກມື້, ພວກເຮົາທຸກຄົນຈົ່ງພ້ອມໃຈກັນປະຕິບັດມາດຕະການ ຕາມແຈ້ງການຂອງຫ້ອງວ່າການສຳນັກ ງານນາຍົກລັດຖະມົນຕີ, ສະບັບເລກທີ 308/ຫສຍນ, ລົງວັນທີ 31 ມີນາ 2021 ແລະ ຄໍາແນະນໍາເພີ່ມເຕີມຂອງຄະນະສະເພາະກິດ, ສະບັບເລກທີ 3443/ສພກ, ລົງວັນທີ 12 ເມສາ 2021 ທີ່ວາງອອກຢ່າງເຂັ້ມງວດ ເພື່ອປ້ອງກັນໂຕເອງ, ຄົນອ້ອມຂ້າງ ແລະ ປະຊາຊົນລາວທຸກຄົນ ຈາກພະຍາດໂຄວິດ-19.

ຂ້າພະເຈົ້າຂໍຮຽກຮ້ອງມາຍັງອົງການປົກຄອງທ້ອງຖິ່ນ, ທະຫານຊາຍແດນ, ເຈົ້າໜ້າທີ່ຕຳຫລວດ ເອົາໃຈໃສ່ເຝົ້າລະວັງ, ກວດຂັນຕາມຈຸດຜ່ານແດນທ້ອງຖິ່ນ ແລະ ດ່ານຂ້າມລອຍຢ່າງເຄັ່ງຄັດ ແລະ ເຖິງຄອບຄົວຍາດຕິພີ່ນ້ອງ ຈົ່ງເປັນຫູເປັນຕາຊ່ວຍກັນ ຫາກຮູ້ວ່າມີຄົນໃນຄອບຄົວຂອງທ່ານ ເດີນທາງມາຈາກປະເທດໃກ້ຄຽງ ທີ່ກຳລັງມີການລະບາດຢູ່, ຈົ່ງຮີບຮ້ອນ ນຳຜູ້ກ່ຽວໄປແຈ້ງຕໍ່ເຈົ້າໜ້າທີ່ ເພື່ອສົ່ງຜູ້ກ່ຽວໄປສູນຈຳກັດບໍລິເວນ ແລະ ເກັບຕົວຢ່າງມາກວດຫາເຊື້ອໂດຍໄວ ເພື່ອສະກັດກັ້ນການແຜ່ເຊື້ອໃສ່ຄົນອ້ອມຂ້າງ ແລະ ໄປສູ່ສັງຄົມ.

ຂໍຂອບໃຈ