ข่าวทั่วไป

ມອບປຶ້ມ “ເປີດປະຕູ່ສູ່ປະເທດຈີນ” ພາສາ ລາວ-ຈີນ ໃຫ້ຫໍສະມຸດແຫ່ງຊາດ

ມອບປຶ້ມ “ເປີດປະຕູ່ສູ່ປະເທດຈີນ” ພາສາ
ລາວ-ຈີນ ໃຫ້ຫໍສະມຸດແຫ່ງຊາດ

ຂປລ. ໃນຕອນບ່າຍຂອງວັນທີ 2 ມີນາ 2021 ທີ່ຫໍສະໝຸດແຫ່ງຊາດ, ວິທະຍຸສາກົນແຫ່ງປະເທດຈີນ ຮ່ວມກັບ ສະມາຄົມນັກປະພັນລາວ ໄດ້ມອບປຶ້ມໃໝ່ພາຍໃຕ້ຫົວຂໍ້ “ເປີດປະຕູ່ສູ່ປະເທດຈີນ” ຈຳນວນ 4 ເຫລັ້ມ ທີ່ພິມເປັນ 2 ພາສາ ມີ ພາສາລາວ ແລະ ພາສາຈີນ ໃຫ້ຫໍສະໝຸດແຫ່ງຊາດ ເນື່ອງໃນໂອກາດ ປີ 2021 ເປັນປີມິດຕະພາບລາວ-ຈີນ ແລະ ກະກຽມສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 60 ປີ ທີ່ຈະະມາເຖິງນີ້ ແລະ ຕາງໜ້າມອບປື້ມດັ່ງກ່າວ, ໂດຍ ທ່ານ ທອງໃບ ໂພທິສານ ຫົວໜ້າກົມມໍລະດົກ ທັງເປັນປະທານສະມາຄົມນັກປະພັນລາວ ແລະ ທ່ານ ນາງ ແສງແກ້ວ ຫົວໜ້າວິທະຍຸສາກົນແຫ່ງປະເທດຈີນ ປະຈຳ ສປປ ລາວ, ກ່າວຮັບໂດຍ ທ່ານ ນາງ ຂັນທະມາລີ ຍັງນຸວົງ ຜູ້ອຳນວຍການຫໍສະໝຸດແຫ່ງຊາດ.

ທ່ານ ນາງ ແສງແກ້ວ ກ່າວວ່າ: ປຶ້ມທີ່ນຳມາມອບໃນຄັ້ງນີ້ ມີ 4 ເຫລັ້ມ ຄື “ຮູ້ຮອບຈີນ”, “ສັງລວມຄໍາສັບສໍານວນໂຕງໂຕຍ ແລະ ສຸພາສິດຈີນ-ລາວ, ລາວ-ຈີນ”, “36 ກົນລະຍຸດ” ແລະ ປື້ມ “ກະວີເພື່ອເຈົ້າ ເປັນບົດກະວີຈີນສະໄໝປັດຈຸບັນຮ້ອຍບົດ”, ເຊິ່ງເປັນຜົນງານການຮ່ວມມືລະຫວ່າງວິ ທະຍຸສາກົນແຫ່ງປະເທດຈີນ ກັບສະມາຄົມນັກປະພັນລາວ ລວມທັງໝົດມີ 228 ຊຸດ ມີຈຳນວນ 912 ຫົວ ເພື່ອມອບໃຫ້ຫໍສະໝຸດແຫ່ງຊາດ ແລະ ບັນດາຫໍສະໝຸດຢູ່ຕ່າງແຂວງ, ປຶ້ມເຫລົ່ານີ້ເປັນບົດວັນ ນະຄະດີ, ສາລະຄະດີ ທີ່ດີເດັ່ນຂອງຈີນ ເຊິ່ງອາດຈະເປັນປະໂຫຍດ ແລະ ໃຫ້ຄວາມຮູ້ ສະຕິປັນຍາທີ່ດີຕໍ່ຜູ້ອ່ານໃນລາວ, ເຊື່ອໝັ້ນວ່າປຶ້ມທັງ 4 ເຫລັ້ມ ຈະເຮັດໃຫ້ຜູ້ອ່ານໄດ້ຮັບຮູ້, ເຂົ້າໃຈປະເທດຈີນ ແລະ ປະຊາຊົນຈີນຫລາຍຂຶ້ນກວ່າເກົ່າ.
ໂອກາດດຽວກັນນີ້, ທ່ານ ນາງ ຂັນທະມາລີ ຍັງນຸວົງ ໄດ້ສະແດງຄວາມຂອບໃຈ ແລະ ຕີລາ ຄາສູງຕໍ່ການພິມຈໍາໜ່າຍປຶ້ມໃໝ່ 4 ເຫລັ້ມໃນຄັ້ງນີ້ ແລະ ຈະນຳໃຊ້ປື້ມດັ່ງກ່າວ ໃຫ້ເກີດຜົນປະໂຫຍດສູງສຸດ, ນອກຈາກຮັກສາໄວ້ຢູ່ຫໍສະມຸດແຫ່ງຊາດ ເພື່ອໃຫ້ຜູ້ອ່ານຢູ່ນະຄອນຫລວງວຽງຈັນ ໄດ້ອ່ານແລ້ວ, ປື້ມຈຳນວນໜຶ່ງຈະສົ່ງໄປໃຫ້ຫໍສະໝຸດຢູ່ຕ່າງແຂວງຕື່ມອີກ, ເພື່ອໃຫ້ຜູ້ອ່ານໃນຂອບເຂດທົ່ວປະເທດໄດ້ອ່ານນຳກັນຢ່າງທົ່ວເຖິງ.

ຂໍຂອບໃຈ