ข่าวทั่วไป

ຜູ້ຕິດເຊື້ອໂຄວິດ-19 ຢູ່ສະຫວັນນະເຂດ 5 ຄົນໄດ້ຮັບການປິ່ນປົວດີແລ້ວ

ຜູ້ຕິດເຊື້ອໂຄວິດ-19 ຢູ່ສະຫວັນນະເຂດ 5 ຄົນໄດ້ຮັບການປິ່ນປົວດີແລ້ວ

ຂປລ. ແຫລ່ງຂ່າວຈາກແຂວງສະຫວັນນະເຂດ ໃຫ້ຮູ້ວ່າ: ພະແນກສາທາລະນະສຸກແຂວງສະຫວັນນະເຂດ ຈັດສົ່ງຜູ້ຕິດເຊື້ອໂຄວິດ-19 ຈໍານວນ 5 ຄົນທີ່ປິ່ນປົວຫາຍດີ ແລະ ກັບໄປສືບຕໍ່ຕິດຕາມອາການຢູ່ເຮືອນ ເປັນຊຸດທີ 3 ໃນວັນທີ 17 ພຶດສະພາ 2021 ນີ້ ຢູ່ທີ່ໂຮງໝໍສະໜາມບ່ອນປິ່ນປົວ ໂດຍມີ ທ່ານ ດຣ ຕຽງຄຳ ປ້ອງວົງສາ ຮອງຫົວໜ້າພະແນກສາທາລະນະສຸກແຂວງ, ທ່ານ ດຣ ນາງ ພູວິໄລ ແກ້ວມຸງຄຸນ ຜູ້ອຳນວຍການໂຮງໝໍແຂວງສະຫວັນນະເຂດ ພ້ອມດ້ວຍຄະນະແພດຜູ້ປິ່ນປົວ ໄດ້ຮ່ວມພິທີສົ່ງ.
ໂອກາດນີ້, ທ່ານ ດຣ ຕຽງຄຳ ປ້ອງວົງສາ ໄດ້ແນະນຳໃຫ້ອຳນາດການປົກຄອງຈົ່ງໄດ້ແນະນຳໃຫ້ປະຊາຊົນບໍ່ໃຫ້ມີຄວາມແຕກຕື່ນ, ເພາະວ່າພວກກ່ຽວແມ່ນໄດ້ຮັບການປິ່ນປົວຫາຍດີແລ້ວ, ຈົ່ງພ້ອມກັນຮັກສາ ແລະ ປ້ອງກັນຕົນເອງຕາມມາດຕະການຕ່າງໆຢ່າງເປັນປົກະຕິ, ສ່ວນຜູ້ທີ່ອອກຈາກໂຮງໝໍກໍຕ້ອງສືບຕໍ່ກັກໂຕ ແລະ ຕິດຕາມອາການຂອງຕົນເອງຕື່ມອີກ 14 ວັນ, ຮັກສາມາດຕະການປ້ອງກັນທີ່ວາງອອກ ເປັນຕົ້ນແມ່ນການລ້າງມືດ້ວຍສະບູ ຫລື ໃຊ້ເຈວ, ຮັກສາໄລຍະຫ່າງ, ຫ້າມເຂົ້າໄປບ່ອນຊຸມນຸມຊົນ, ໃຊ້ຜ້າອັດປາກ-ດັງ ແລະ ອື່ນໆ.

ມາຮອດປັດຈຸບັນ, ທົ່ວແຂວງສະຫວັນນະເຂດ ມີຜູ້ຕິດເຊື້ອສະສົມ 65 ຄົນ, ໃນນີ້ປິ່ນປົວດີແລ້ວ 12 ຄົນ, ຍິງ 6 ຄົນ ແລະ ຍັງສືບຕໍ່ປິ່ນປົວຢູ່ສູນປິ່ນປົວ 53 ຄົນ.

ຂໍຂອບໃຈ