ข่าวทั่วไป

ທູດຝຣັ່ງ ມອບລາງວັນໃຫ້ຜູ້ຊະນະແຂ່ງຂັນຖ່າຍຮູບພາບ

ທູດຝຣັ່ງ ມອບລາງວັນໃຫ້ຜູ້ຊະນະແຂ່ງຂັນຖ່າຍຮູບພາບ

ຂປລ. ໃນວັນທີ 17 ມີນາ 2021 ທີ່ສະຖານທູດຝຣັ່ງ ປະຈຳ ສປປ ລາວ ໄດ້ມີການມອບລາງ ວັນໃຫ້ຜູ້ຊະນະການແຂ່ງຂັນຖ່າຍຮູບ ພາຍໃຕ້ຫົວຂໍ້ “ພາບບອກເລົ່າເລື່ອງລາວ” ໂດຍມີຜູ້ຊະນະການແຂ່ງຂັນທັງໝົດ 8 ທ່ານ ໄດ້ຮັບລາງວັນເປັນບັດແທນເງິນສົດ 1 ລ້ານກວ່າກີບ ເພື່ອແລກຊື້ອຸປະກອນຖ່າຍຮູບ ແລະ ໄດ້ເຂົ້າຮ່ວມຝຶກອົບຮົມກັບຊ່າງຖ່າຍຮູບມືອາຊີບ ຂອງສຳນັກຂ່າວປະເທດຝຣັ່ງ ປະຈຳບາງກອກປະເທດໄທ, ມີຜູ້ແຂ່ງຂັນສົ່ງຮູບເຂົ້າປະກວດທັງໝົດ 400 ກວ່າຮູບ ຈາກແຂວງຕ່າງໆ ທົ່ວປະ ເທດ.

ທ່ານ ນາງ ຟລໍຣ້ອງສ ຊັອງບລັອງ-ຣີສແລກ ເອກອັກຄະລັດຖະທູດຝຣັ່ງ ປະຈຳ ສປປ ລາວ ໄດ້ກ່າວວ່າ: ການແຂ່ງຂັນຖ່າຍຮູບ “ພາບບອກເລົ່າເລື່ອງລາວ” ໄດ້ຈັດຂຶ້ນແຕ່ເດືອນກຸມພາ 2020 ຫາ ເດືອນກຸມພາ 2021 ໂດຍການຮ່ວມມື ຂອງສະຖານທູດຝຣັ່ງ ແລະ ສະຖານບັນຝຣັ່ງ ປະຈຳລາວ ເປົ້າໝາຍຫລັກຂອງການຈັດການແຂ່ງຂັນນີ້ ເພື່ອສະໜັບສະໜູນພັດທະນາ ຄວາມເປັນມືອາຊີບ ຂອງຊາວໜຸ່ມລາວທີ່ມີພອນສະຫວັນ ແລະ ຈັດສະແດງຜົນງານຮູບຖ່າຍທີ່ຊະນະການແຂ່ງຂັນໃຫ້ມວນຊົນໄດ້ຊື່ນຊົມຢ່າງກວ້າງຂວາງ,

ພ້ອມນີ້ ຍັງເປັນການບອກເລົ່າກ່ຽວປະເທດລາວຜ່ານຮູບຖ່າຍອີກດ້ວຍ.
ການແຂ່ງຂັນຄັ້ງນີ້ ແມ່ນເປີດກວ້າງສຳລັບທຸກຄົນ ໂດຍບໍ່ມີເງື່ອນໄຂໃດໆ ແລະ ໄດ້ມີມວນຊົນສົ່ງຜົນງານຮູບຖ່າຍເຂົ້າຮ່ວມແຂ່ງຂັນຫລາຍກວ່າ 400 ຮູບ ຈາກແຂວງຕ່າງໆພາຍໃນປະເທດ, ພາຍຫລັງທີ່ຄະນະກຳມະການຕ່າງປະເທດ ໄດ້ຄັດເລືອເອົາຜົນງານປະຈຳແຕ່ລະເດືອນແລ້ວ ກໍໄດ້ໂພສລົງເຟສບຸກຂອງສະຖານທູດຝຣັ່ງ ເພື່ອໃຫ້ຄົນລາວຮ່ວມໂຫວດ ເອົາຮູບຊະນະເລີດ ປະຈຳເດືອນນັ້ນ ລວມມີຄົນເຂົ້າຮ່ວມໂຫວດທັງໝົດ 1.600 ຄັ້ງ; ຫລັງຈາກການໂຫວດກໍໄດ້ຮູບທີ່ຊະນະ ຈຳນວນ 8 ຮູບ ເຊິ່ງຜົນງານຮູບທີ່ຊະນະການແຂ່ງຂັນ ກໍ່ຖືກນຳມາວາງສະແດງອ້ອມກຳແພງສະຖານທູດ ຝຣັ່ງປະຈຳລາວ ເບື້ອງຖະໜົນເດີລາມີຊີອົງ ແລະ ຖະໜົນມະໂຫສົດ.

ຂໍຂອບໃຈ